Yoshlar kuni doirasida shaxmat turniri tashkil etildi
Har payshanba kuni o‘tkazib kelinayotgan “Yoshlar kuni” tadbirlari doirasida rahbarlar hamda yoshlar ishtirokida strategik fikrlash, vaziyatni tahlil qilish, risklarni oldindan baholash va to‘g‘ri qaror qabul qilish ko‘nikmalarini rivojlantirishga qaratilgan ommaviy shaxmat turniri tashkil etildi.
Turnir “UzChess” platformasi hamda an’anaviy formatda o‘tkazilib, unda ishtirokchilar o‘zlarining mantiqiy fikrlash, strategik rejalashtirish va tezkor qaror qabul qilish qobiliyatlarini sinovdan o‘tkazdilar.
Musobaqa davomida shaxmatning nafaqat sport turi, balki strategik fikrlash va qaror qabul qilish maktabi sifatidagi ahamiyatiga alohida e’tibor qaratildi. Har bir yurish oldidan vaziyatni chuqur tahlil qilish, ehtimoliy xavflarni baholash, bir nechta muqobil variantlarni ko‘rib chiqish va eng maqbul qarorni tanlash kabi ko‘nikmalar ish faoliyatida ham muhim ahamiyat kasb etishi ta’kidlandi.
Tadbir yoshlar va rahbarlar o‘rtasida do‘stona muhit, sog‘lom raqobat va tajriba almashish uchun ham samarali maydon bo‘ldi. Ishtirokchilar o‘zaro fikr almashib, strategik yondashuv va jamoaviy muloqotning ahamiyatini yanada chuqurroq his etdilar.
Mazkur tashabbus yoshlarning intellektual salohiyatini rivojlantirish, ularning bo‘sh vaqtini mazmunli tashkil etish hamda strategik fikrlaydigan, mas’uliyatli va puxta qaror qabul qila oladigan yosh mutaxassislarni shakllantirishga xizmat qiladi.
“Yoshlar kuni” — bilim, tafakkur va yangi imkoniyatlar maydoni!